جنينءِ روچ
اٶمات منى گٶھاران منى
شيِرزادءُ شيرزالاں منى
اٶ دُھترءُ دُھتان منى
روچ نوں شُمي گنت اِيمنى
مرچى گٶشنت روچءِ جنين
روچى که درُستين سرزمين
درٶ بانوک ءُ , راج دُتگاں
نوں ھشت مارچءِ ياد کنين
شَرياد کَنِ اِت مه گٶنَگاں
آ ھانىءِ دٶدءُ دَماں
ياکه سَدو تى تا نلاں
ھروھد وتى دٶرءُ زماں
ياميرانءِ مات رِندءِ توار
آ چاکرے زِردے مراد
آ بانڑى آ سرمچار
ميٸ عزتءُ لجءُ ميار
تاريخءَ آ زندگ کتگ
آ وا مثالى اير کتگ
چو کمبرءِ ماتءُ گٶھار
کومءَ وتى نامدار کتگ
چوکه گٶشنت راجدپتراں
نوں ياد بَنت گپءُ بياں
ميٸ زال وتى مَٹءَ وت انت
درُستيں جھان ءُ کشوراں
اٶ ميٸ بلوچ شِيردُتگاں
مرچى دِگرروچى اداں
اٶمه لقايں مادران
در کپ درا گوں مھتراں
گٶں ھلھله کوکارکناں
گٶں گريشگءُ گُرگ بياں
آزاتىءِ گپ ءُ تِراں
نوں سر کَنِيت درُستيں جھاں
ھرسال ھمے روچءَ پدا
ھنچو که دنياے وڑا
ديما روان انت ھرگٶرا
گوں زالءُ بولانءِ ردا
جشنءُ دَمالاں گٶاز کن اِت
نازينک ءُ صوتءُ ساز کن اِت
غم دور کن ايت شاده کن اِت
دنيايے ظُلم ءَ گار کن اِت
کوران بجن گوانکءُ توار
بل که ببيت لھتى په سار
ميٸ زالءُ بول ماتءُ گٶھار
ھِچبَر مَگِنداَت ظلمءُ زار
کوران دامنى
مارچ ۲۰۰۸
No comments:
Post a Comment