يکجاھىءُکولءُ کرار

 

کؤران دامنى 

گِپتگ ميٸ مُلک اجنبى

کُرتگ تباه ميٸ زندگى
دُزنت بَرَنت چو سَرپه سَر
مالاں بلوچے سيمءُ زر
قصرءُ گذرجوڑ کن انت
په وت کلاتاں اڈ کن انت
چه مُلکءُ ميتگءَ وتى
ميرين بلوچءَ دَر کن اَنت
روچى کُشنت براتاں ميٸ
روچى برنت مالاں ميٸ
روچى وتى آ کومءُ برات
يارنت به نِندَنت مُلک ميٸ
ملکءُ تَياب گوں اجنبى
نيست مۓ بلوچءَ زندگى
اے وھدءُ روچاں گَندگى
تا کَد کنين اے بَندگى
اے بَندگى بيچارگى
بَس انت په ما يَکپارگى
پادا بلوچ ءُ نو جوان
کَشين دَرا اے اجنبى
ھيچ اجنبى مُلکءَمبيت
نے لِڑکى نے چِرکى
اے وارىءُ اے بَزگى
پَرما مَبيت اے زندگى
اے ظلم ءُ اے زوران سَرى
بس انت په مانوں يک بَرى
چو در پَدر چو بے حَبر
چوگريوگءُ چوزارپه سَر
چو بے وسءُچو سَر گِسر
بيزار چه زندءَ بے ثَمر
چوبےتوارچونے پَه سار
چوبے وتءُ اے وت شزار
تا کَد چو گار تا کَد چو وار
ھَنگت نھينت بَس, تارءُمار
اے وا نھنت کِسمت ميٸ
کِسمَت کُتگ دشمن ميٸ
اے کِسمتءُاے کِسمتان
ياورتگ په مامۓ دُشمنان
دُشمن کُتگ ما را جُدا
کرتگ په نامءِ يا ھُدا
اے مۓ درُستيں ھَستيان
دشمن که بارت په مَستيان
جنتءُ کُشيت په کَستيان
مِڈِ ينيت ما را دَستيان
اے برات کُشىءُکُشتءُکُش
بايد بِبِيت روچى شَموش
يکجاه ببين په سارءُ ھوش
ھِجبرمَبين چوپُرشتءُ پروش
نوں مۓ سراچوظلمءُ زور
تاکَد ببيت گوں دردءُ دور
تا کَد کنين اوپار اِشان
اوپار نبنت گيشتِرچوشان
بےوس بلوچ حَدءَ دَرنت
زنجيرءُ زوريں سانکل اِنت
بيا مۓ جوان ءُ نوجوان
مرچى پدا عھدے کنان
عھد په بلوچىءِ زبان
زندش گرين زندش گوں جان
کول په بلوچىءِ مَرام
وابش گرين چَمان مُدام
يکجاھىءُ کول ءُ کرار
ميگ ءُ تيٸ گوانک ءُتوار
تاں که مَبين کسے وَدار
ھورى ببيت ھر وھد ھَوار
آزات کنين مُلکءَ وتى
آزات کنين عِزت وتى
عِزت وتى غيرت وتى
دستءَ ببوتين مۓ وتى
وَل گوج کتين دشمن وتى
چه گل زمينءَ مۓ وتى
ملکءِ بلوچان په بلوچ
نوں شادھى بيت روچ په روچ
ڈُھلءُ دمال ءُ سازکتيں
غم دورکتيں شاده کتيں
مُلکءَ پَداسالونک کتيں
بانوريں نازينک جتيں
کِرءُ گوراں پيرءُ جوان
مِسکءُ زَبادءُ شَربووان
اے گُل زمين اے مَھپران
چنڈينتين مه کوهءۀ گَران
بوچنڈِيتءُ مِھلب کنيت
سورناءُ صوتءُ سازکنيت
ڈُھلء ُتواراں باز کنيت
چاپى,سے چاپى ناچ کنيت
شادانءُ وشدل راز کنيت
روچ شادھينان گواز کنيت
ملک مۓ بلوچستان ميٸ
تپتانءُ مزن زِر ھم ميٸ
پنجگورميٸ,شال ھم ميٸ
چاغى گوں خاران ھم ميٸ
لاشار ميٸ , پھره ميٸ
تُربَت ميٸ ,دزآب ميٸ
چابھارءُ گوادر ھم ميٸ
اے ھم ميٸ اَ ھم ميٸ
اے کوه ءُ دشتان ھم ميٸ
درستين بلوچستان ميٸ
مرچى شُتنت آ زِياتيان
آزاتين گوں آزاتيان
کؤران بِجن گوانءُ توار
تا که ببيت لھتے په سار

 

کوران دامنى