''پَھره'' مَنى پَھراِنت مَنى

از کؤران دامنى

پَهره بلوچے پھرءُ شان٬پھره منى جدے نشان
پھره تيى پھره منى ٬ پهره دلنت سَر مکُران
پھره منى پھراِنت منى ٬ھروھد بِبَاتے جان منى
آباد ءُ سَرزِندَگ بِبَے٬ دَنزے مَگيپت ديما تيى
جورين بَدانى چَم تَھار٬ھِجبَر مَباتے بى کَرَار
تے حُسنءُ تےزيبايىءَ٬ دِلترک ءبنت چوبارءُبار
ھرکوهءُدشتءَتوبِچار٬کاھوک بلوچى وَش وَراک
پُترونکءُدَھلُک پيمَلوک٬سمسورمَگيَرسَردَرچه حاک
آ تۓ کُنارءُ پُرک ءُ داز٬کوَنَل پَه گُژنۓ دارَگءَ
ھَنچو کَليرءُ زيرُکاں ٬ ھِنجير مه کوھانى گؤرءَ
جُوانين مُلوکءُ دِلبَران٬گُلپوشءُوَش کَديں گُل انت
دَست دوچين پوشاکاں گؤرانت ٬مزوانک مه لُنٹانءَجَن انت
بوچَندَنءُمھلب کن انت٬ نازينکءُصوتءُسازکن انت
گوں مَلَگان گوں لُڈگان٬ ھوش ءُ سرءَ مۓ گار کن انت
پھره بے کَلينک ءَ نبيت٬ کَلينک بے کورءِ کَلکَلى
سوراب ءُ بَگدانى پَه گؤر٬ نِشتَگ په وَشءُ وَشدِلى
پَھره بِگِر تا ڈمن ءَ ٬ ھنچو برو کارواندر ءَ
دَشت ءُ دَرَگ کوه ءُ کَمر٬ تُرُپشُک بَليڈى سر درءَ
پَھره تا ابتِر چار کَدَم ٬ آ ديمتِرا سربازءُ راسک
ھرچى که گِندے ره سَران٬ پُلءُ گل اَنت گوں جَرءُدار
بُمپورگوآ کِشتءُکِشار٬گَندم پَه يَک گؤردرچکءُدار
کوٹِيگ په تامءَجُست مَگِر٬ په شيرکنى کَنڈانت به چار
بُمپورتَيٸ ھم کوپَگ انت٬لاشار تٸى براتءُ گُھار
سَرباز گؤن باگ ءُ ميوه گان٬ روت انت تا گَنجين چابھار
حُرما مُضاپتى شَرترين٬ لاشارزَمين مَٹءَ وتِيں
اِسپکه مِسکوتان بِگِر٬ پَنوچ ءُ چامپ ءَ وڑ وڑيں
کوپچے اگرنامءَ گِرے ٬ آ وَت په وَت راج دَپترانت
ھَنگَت پَمۓ لاشار زمين ٬ روژنے سُپاہ انت شَرتِرانت
بَزمان گوآ ميرين بلوچ٬ھم کوپَگءُھم براتءُدوست
دلگانءُ گزّھکءُ تنھک ٬ ھروَھد بلوچے يارءُ اوست
پَھرِاِنت منءَ پَرکوم ءُ برات٬ھرنيمگءَ چارے بِچار
پَھره زمين وَشدِل بِبَات ٬ آباد بِبَات ھم بارءُ بار
آ پَهره اى نامى کَلات ٬ دوست محمد ءِ جاهءُجلال
ھنگت بلوچے کَھرءُ پھر٬منتگ پَما کَرنے پَه سال
پَهره پَه غيب الله سلام ٬ ھروھد تيٸ ياداں کَپاں
تۓ کِسَيا ن تۓ وَشگَپا ن ٬ ھنگت پَما نام ءُ دپاں
شعرءُ توارءُ زيملان ٬ رمضان وتى مَٹ ءُ کَرار
اَپسوز پَه اِے کميّں زَماں ٬ گِپتى چَه ما آ وش توار
جانوک ڈھُلى آ کُج ايں٬ پَرَام پَه پَرَام ڈھل بِجنت
سورناءُ سازان چَھربوارت٬ سےچاپىءِ ناچ ءَ بکنت
شھرے کُليان وش گؤشين٬پيرل گؤں صاحبدادے ياد
نازينک ءُ صوتءُ ليکوان ٬ ماشاالله ءِ شَرين توار
پهره زمين رَنِجِت مَبات٬ کؤران بِبيت کُربان تَرا
پَه گيشرءُ لانٹيگ تيٸ ٬ جور ءُ کَرَگ بَستَگ سرا

کؤران دامنى

 

  ۲۷-۱۲-۸۵
­++++++++++++++++++++++++++++++++++++++++++++++++++++++++++
واجھانے که ھنون مے درميانءَ نَھنت ٬مَگر آيانى ياد٬زحمت ءُ محنت په بلوچ وبلوچستان ءُ پهرهءَ ٹيکے اِت که ھِجبر ياداں نروت.
واجہ غيب الله کشاورز= يکے چه سَرحالترين٬وَشگپترين وزحمتکش ترين ٬باشنده پھره اى بوتگ٬ که ھروھد ءَ نااُميتيں مردمانءَ ٬آ واجہءِ گپ ءُ حبرءُ کِرداراميدوارکُرتگ.غيب الله يکے چه وشتريں شکست بندانءِ پهره زمينءَ ھم ھست ات.
رَمضان کشاورز= يکے چه وش گٹ ترين پهره اى آواز وان بوت اگ که تا نود سالگى ءَ ھم صوت و آوازوانت اگ .
جانوک ڈھُلى=جان محمدءِ ڈھلے توار بے تَھَمبُلين مردمءَھم په ناچءَ چِست کُتگ٬وتا ھنون ھيچ ڈھلى اے په آ واجہ ءِ حدءَ نَپُجِته.
پيرل ءُ صاحبداد = صاحبداد پيرل ءِ عارفين پِيت اِنت که اے پِت ءُ چوک نزديک به کَرنے په بلوچ وبلوچستان سروزوساز جَت ءُ آواز وانت.