دوتءُ دنگلان

کؤران دامنى

چاراں وتى دورءُ برا
گنداں جوانان ھر گورا
پيرنت گوشے پيسرترا
پيش چه وتى وھدءِ سرا
حيرانءُ ھُشکءَ تَرَگنت
بيکارءُ نا اميت گردَ گنت
بازے چه وھد پشت کَپتگنت
چه کارواں جه سِستگنت
بازينے معتاد ءُ زوال
گوں دشمنءَ لھتے ھوار
مجبورىءِ دورءَ سوار
نيستِش په وت جاهءُ دوار
روچءَ په شپ ترينتگنت
شپ تا صباح کورينتگنت
ترياک ءُ بابور کُرتگنت
چه زندگى سرسِستگنت
نے ايمن ءُ نے وشدلنت
سربار کوما بوتگنت
راه ءُ دَرِاش گار کُرتگنت
وت گارءُ گُمساربوتگنت
نوں نوجوان ھم بَزَگنت
آ ھم ھمے آس سُتکگنت
ھنچوگوشے پيربوتگنت
سالانءُ کرناں گوستگنت
ھَنگت که بيست سالگ نھنت
نوں وا گوشے شصت سالگنت
اؤمۓ جوان ءُ نوجوان
کمے وتى دودا بوان
بل دشمنانى پندلان
بِلِ ات اے دوتءُ دنگلان
پرچے وتءَ بے سار کنے
تا کَد وت ءَ چوگار کنے
گوں دشمنءُ گوں اجنبى
پرياتءُ زارى باز کنے
پادا وتى مُلکءَ بگِر
مُلک تے وتيگنت چو جَگِر
ھژار ببے نوں روچ په روچ
بيا دشمنے کبرا بکوچ
کوران گوں وت ھمراه بکن
دشمن چه لوگءَ دربکن
ملکءَ په وت آزات بکن
بيا جار بجن صلوات بکن
آزاتى ءَ کوکار بکن
عزت وتى کوم ءَ بکن
اے حالءُ احوالاں درو
درُستِن جِھانے سربکن

کوران دامنى